初出茅蘆上班第一個星期，公司擴張分拆子公司後大執位，新坐喺我前右方嘅就係大師。從此我係全公司最清楚佢工作嘅人之一，因為日日喺位抬頭向兩點鐘方向望就係睇住佢個螢光幕。 當人人忙到放飯或放工都有遲無早之際，我發現呢位大哥係不受附近時空事物拘泥，專心開 Illustrator 放大縮細，喺度畫花畫草畫雀仔，但又真係畫得好襟睇。 平時唔會主動同人講野，但周圍嘅人不論部門都周不時來問佢意見，打擾佢畫公仔，所以幅幅都畫一兩日。當時心諗，呢間真係好公司，出糧請人做佢地鍾意又善長嘅野又得，參與其他部門嘅工作又得，仲有返工時間自己話事！ 後來先知佢係多材多藝嘅二老細，以身作則鼓勵大家應該務正業之外努力鑽研其他有用和有趣的事，成就昔日同事紛紛像 Paypal Mafia 一樣成為今天在各行業發光發亮的誇領域創新科技領袖們薪火相傳，延續大師的影響力。

有日約咗女友放工食記念日晚飯，但自入職受大師良性影響秒秒瞓身投入工作，到臨放工都未安排夜晚食乜，情急智生，厚住面片請教大師介紹啱拍拖嘅餐廳。 佢聽完就招牌咪眼一句：「得！去深水埗萬發啦，係九江街叫飯店果間，唔係其他萬發！」 果陣仲係細路仔，完全無諗過記念日可以約女友去舊區食啲咁男人浪漫嘅大排檔，但大師嘅品味同解難能力堅係世一，果度嘅撚手小菜配枝大啤，一晚已經拉近咗同女友嘅距離，為之後結婚打下穩固基礎，亦得到大師帶埋囝囝到場祝福。