大師係一位好自律同家庭為中心嘅暖男前輩，你話無功不受祿，唔慣未做完project就慶祝。每日做完嘢就會即刻翻房陪屋企video chat。

你見大家都stressed 然後推起街邊車仔。一瞬間，大家就熟落咗。多謝你。

2018年11月，我哋project臨時要求要去三個國家四個城市做UAT，當時大部分同事都要放假，作為新仔嘅我膽粗粗黎搵你同Teddy，點算呢大師。你見我難做，聽完project debrief後，你話「唔怕 有我係度」。我以為你會搵個其他team嘅救兵，但係原來係推咗其他schedules自己陪我地去test。 係三亞時，第一站test出咗好多突發情況，我同時要應好多人嘅feedback，有啲client講野仲比較直接同難聽。你靜靜企係我隔離，幫我記錄我記唔晒嘅points，同我講，技術有你同teddy搞掂一定無問題，我同April去搞掂business就得。終於結束咗三亞所有test之後我哋一齊可以坐低飲杯野，我哋問你大師點解你會做呢行，你話「因為好玩，我當時由英國返黎，就係覺得internet真係好玩。如果有一日你覺得你做緊嘅嘢唔開心，你應該問下係咪值得做落去。」 三亞布吉曼谷，我哋只係用咗7日。真係對唔住大家，第一次帶隊跨國做UAT無預留時間俾團隊stay behind去玩去抖抖，唔同時區飛黎飛去，大家都真係好攰。多謝你同條team都無怨過我，係你完成咗曼谷test準備飛翻香港果陣，我想話大家一齊食豪啲，你同我講「我唔慣未做完嘢就慶功，無功不受祿」。 到項目最終完成咗，我send message比你話，大師，我哋可以慶功了。大家都話大師唔會join team dinner㗎。但係你話黎，我信你真係會黎，因為我哋project完美結束。而你無食言，真係出現咗係胡爐。只係我無估到，原來果次就係我地最後一次見面。 你一直用你行動去幫助每一個朋友後輩甚至普通同事，你用令人最舒服嘅方式去引導他人幫助他人，你會聽到其他人需要幫忙第一時間無私地全力以赴… 呢個星期我一直諗唔通一直唔想接受，我不斷睇翻之前嘅相同WhatsApp記錄，多謝你陪伴我哋嘅時間，好感激你陪我哋癲陪我哋玩陪我哋辛苦。我估，一定係上帝發現佢地果邊科技太落後，所以需要你呢位大師過去幫佢哋做digital transformation。你記得build好晒啲framework就要抖下，揸部無人機話翻比我哋知，你係果邊生活得好好。我們永遠掛著你。🧡

在寫這篇文章之前，一直在電話相簿中搵和大師的合照，才發覺原來一起共事十數年的大師沒有太多相片，在無數個project相片裏面，我都幾肯定大師有90%以上參與其中，但竟然搵唔到大師嘅蹤影，這令我更加懷念在我人生事業上幫助好多嘅大師，喺呢十幾年裏面，無論從剛開始design 到後來的innovation project, 大師都係中堅分子，永遠都係可以將不可能變成有可能，有問題變都冇問題。我諗呢個都係大師你留俾大家嘅印象。就算每一個project相片搵唔到你嘅蹤影，但其實你嘅精神已經和呢相片緊緊連繫，在每一個相簿，我都感覺到你嘅存在。 大師，永遠懷念你。 圖為某年冬天的Project救亡小隊group的完工慶祝照片

開講有話「男人的浪漫，豆腐火腩飯」大師嘅歷練好似火腩一樣，每舊都經過高溫烹調，佢嘅興趣就似伴菜般各有特色，而佢嘅分享係幾咁有啟發性，只要有機會你就會變身噹叮，喺你無窮盡嘅腦袋入面掏出各種法寶。 對你默默守護同事們、朋友嘅心，日常盡情地投入各樣興趣嘅形象，工作時搵你幫手欲拒還迎嘅表情，加上你果把好標誌性嘅秀髮同鬍鬚，作為一個男人都覺得你好有型。而男人的浪漫，大師絕對係典範！ 生命雖完結，就讓大家將故事延續，感恩有你呢位天使一路守護我哋。

畢業後第一份工作遇上了大師，當年我對攝影一竅不通，大師的攝影技術當然是專業級別，但他仍然願意和我們這班柴娃娃一起到下白泥映日落，他從不嫌你煩，只要肯問，他對會用心答。當然，這不只在攝影上，工作上，我們更是有大師就萬事足，遇上解決不到的設計或技術上的問題，我們總會一致的說「問大師囉」！博學多才、正直、真誠，表面cool cool的，但其實非常平易近人，這就是我心中的大師，感恩人生中遇上過您。

我諗大家都聽過大師好多嘅至理名言，而其中呢句係影響我最深。 無論買咩玩具都好，你唔會care物件嘅價錢、好唔好睇、其他人點講，而你最著重嘅係親自磨考其理，繼而再思考物件同人之間嘅關係，甚至諗辦法附加一啲額外價值喺個物件度。多謝你經常用行動提醒我哋，物係死嘅，人係生嘅，令我哋有對待物質需求永遠保持反思嘅態度。 張相嗰一晚我哋幾個麻甩佬圍埋喺部電腦前面研究架3D車嘅shading, polygons, texture….我哋執著一點一線，其實可能好無謂，但係就係呢啲嘅無謂，反映出我哋嘅passion，就可能係呢啲嘅passion，令我哋對工作都可以當玩，樂而忘返。Passion leads簡單兩個字，你從來都唔係講出嚟，你每次都捲起衫袖做出嚟。 又諗起有日event set up前夕喺airbnb，你同我哋分享你條路係點樣跌跌撞撞行出嚟，一如既往，你絕對唔係嗰種吹水唔抹嘴或者曬威水史，反而係同我哋講吓點樣培養觸覺搵機遇，又講吓以前點樣賴嘢闖禍，又點樣見招拆招，點樣調整心態頂硬上，嗰晚勝過讀十個master degree，受教。 我慶幸可以聽到你語重心長嘅教悔，上次見面你都仲不忘叮囑我睇多啲Gary Vee學Entrepreneurship，我諗我明白，你成為我哋每個人心目中嘅大師，並唔係因為你江湖地位同手藝，而係你真正關心每一個同你共事嘅人，你真心希望佢哋成長，你想傳承你珍而重之嘅passion。 工欲善其事，我會記住做咩都洗濕個頭先，因為我信，洗得夠濕，就會自然儲夠passion令我做得更好。

Letter to Master Alex’s kids, Hope both of you are doing good, even though we all