由我一畢業出嚟做嘢認識大師，對於我黎講，大師唔只係一個老細，一個前輩，一個工作夥伴，佢一直都係我最好同最重要既生命導師。佢從來都冇長篇大論同你講道理，教你呢樣教你個樣，但係佢日常嘅行事為人，就已經係我做人做事既學習榜樣！

記得2008年嘅時候， 大師同Alvin畀機會我同 Alvin Li 由 PacificLink 分拆出嚟，成立一個新嘅 Brand – PixoPunch。對於一個只係出來工作咗四年嘅𡃁仔可以有呢個機會，而家諗番都都覺得好 amazing… 想當年真係唔知佢哋那來有咁大嘅信心，會放心放手畀我地去搞；當時無論係公司名，Logo，人手，生意，都可以話係完全放手畀我地去做。而除咗給予我哋100％嘅 support，大師更加係身體力行，將佢自己搬埋過嚟 PixoPunch，全時間幫助我地成長同發展。呢咁多年嚟，不論係度橋、砌 Proposal 、Event 進場 setup，數唔出咁多個捱夜通宵，大師每次都俾我拉埋佢落水，而佢都毫無怨言。

大師一生嘅時間，除咗佢最重視家庭之外，就係投放曬喺公司、工作、同埋我哋一班後輩身上；感謝你咁多年來甘心樂意咁畀我”偷走” 咗你咁多寶貴嘅時間。得到你咁多年嘅栽培，唯一可以報答你嘅就係將你嘅精神傳承落去，好好善用喺你身上學到嘅野，照顧好身邊嘅每一個人！